44 - திருப்புல்லாணி

                     

                       
அருள்மிகு ஆதிஜெகநாதர் கோயில்

மூலவர் - ஆதி ஜெகநாதர், கல்யாணஜெகநாதர்

உற்சவர்- கல்யாண ஜெகநாதர்

தாயார்- கல்யாணவல்லி, பத்மாசனி

தலவிருட்சம்- அரசமரம்

ராமநாதபுரத்திலிருந்து 10கிலோ மீட்டர் தொலைவில் உள்ள திருப்புல்லாணிக்கு பேருந்துகள் உண்டு.திருமங்கையாழ்வார் மங்களாசாசனம் செய்தத் திருத்தலம்.

சீதையை மீட்க இலங்கை செல்ல ராமன், கடலில் பாலம் அமைக்க சமுத்திரராஜனிடம் அனுமதி கேட்டு மூன்று நாட்கள் காத்திருந்தார்.அப்போது தர்ப்பைப் புல்லின் மீது சயனம் கொண்டார். ராமன் ஆதிஷேசன் மீது தர்ப்பை விரித்து அதில் சயனம் கொண்டார்.அதன்படி சிலை இங்கு அமைக்கப்பட்டுள்ளது.சீதையை மீட்கும் முன் தங்கியத் தலம் என்பதால் சீதை இல்லை.லட்சுமணனின் வடிவமாக ஆதிஷேசன் இருப்பதால் லட்சுமணனும் இல்லை.ஆஞ்சநேயர் மட்டும் உள்ளார்.மூலஸ்தான சுவரில் பாலம் அமைக்க ஆலோசனை செய்த சூரியன், சந்திரன், தேவர்கள் உள்ளனர்.

திருப்புல்லாணியிலிருந்து 4 கிலோமீட்டர் தூரத்தில் சேதுக்கரை உள்ளது.ராமன் இங்கிருந்துதான் இலங்கைச் செல்ல பாலம் அமைத்தார்.சேது என்றால் அணை.அணை கட்டியுள்ள கரை என்பதால் சேதுக்கரை எனப் பெயர்.

திருமங்கையாழ்வார், தவிர்த்து ஆண்டாள்,திருமழிசையாழ்வார்,குலசேகர ஆழ்வார் ஆகியோர் சேதுபாலம் பற்ரி பாடியுள்ளனர்.பஞ்சதரிசனம் பூரியில் பாதியளவே (சிலையின் அள்வே) காட்சி தரும்.இங்கு ஜெகந்நாதர் முழுமையாகக் காட்சித் தருகிறார்.இத்தலம் அதனால் தட்சிணஜெகந்நாதம் எனப்படுகிறது.ஆதி ஜெகந்நாதர் அமர்ந்த கோலம்,கிடந்த கோலம்,நின்றகோலம்,அரச பெருமாள்,பட்டாபிராமர் என ஐந்து வடிவங்களில் மகாவிஷ்ணுவையும் மூன்று கோலங்களில் தரிசிக்கலாம்.

பல நூற்றாண்டுகள் ஆன அரசமரம் இத்தலத்தின் சிறப்பு

43 - திருமயம்

                                   

சத்தியபெருமாள் கோயில்

மூலவர் - சத்தியமூர்த்தி, திருமெய்யர்

உற்சவர் - அழகியமெய்யர்

தீர்த்தம் - சத்யபுஷ்கரணி

விருட்சம் - ஆலமரம்

புதுக்கோட்டையிலிருந்து இருபது கிலோமீட்டர் தொலைவில் அமைந்துள்ளது திருமயம் எனும் திருமய்யம் கோயில்

இத்தலத்தில், சத்தியமூர்த்தி, திருமெய்யர் என இரண்டு மூலவர்கள் உள்ளனர்.சைவ, வைணவ ஒற்றுமைக்கு அருகருகே அமைந்த சத்தியகிரீஸ்வரர் (சிவன்) கோயில், சத்தியமூர்த்தி பெருமாள் கோயில் உள்ளது

திருமயத்தின் விஷ்ணு கோயிலுக்கு ஒரு தனி சிறப்பு உண்டு.ஸ்ரீரங்கம் ரங்கநாதர் கோயிலைவிட் மிகப்பழமையானது.அதுகாரணமாக இத்தலத்திற்கு ஆதிரங்கம் என்றும் பெயர் ஏற்பட்டதாகக் கூறப்படுகிறது.

சத்திய மகரிஷி முன் தோன்றி பெருமாள் காட்சி தந்த தலம்.திருமங்கையாழ்வார் மங்களாசாசனம் செய்தத் தலம்.

இக்கோயில் பல்லவ காலத்து குடவரை கோயிலாகும்.திருமயம் மலைச்சரிவில் ஒரே கல்லினால் அமைந்த இக்குடைவரைக் கோயிலில் இரண்டு பெருமாள் சந்நிதிகள்.வேலைப்பாடமைந்த சத்தியமூர்த்திக் கோயில் அவற்றில் ஒன்று.இக்கோயிலுக்கு ஒரே ஒரு சுற்றுச்சுவர் மட்டுமே உள்ளது.எனவே, இந்த சத்தியமூர்த்தி பெருமாள் கோயிலை தனியே சுற்றி வர முடியாது.
காரணம் மூலவர் கோயில் குடைவரைக்கோயிலாக அமைந்துள்ளதேயாகும்

சதுர்யுகம் என்பது ஒரு யுகம் முடிந்து மறுயுகம் பிறக்கும் காலச்சக்கரத்தைக் குறிக்கும் அளவு.இந்த அளவின்படி திருவரங்கத்துப் பெருமாள் 64சதுர்யுகங்களுக்கு முன்னால் தோன்றினார்.ஆனால் சத்தியகிரிநாதன் 96 சதுர்யுகங்களுக்கு முன் தோன்றியவராதலால் திருமய்யம் திருத்தலம் ஆதிரங்கம் என வழங்கப்படுகிறது.

இத்தலத்தில் சோமசுந்தர விமானத்தின் கீழ், நின்ற கோலத்தில் சத்தியமூர்த்தி என்ற பெயரைத் தாங்கி ஒரு கரத்தில் சங்குடனும் மறுகரத்தில் சக்கரத்துடனும் எம்பெருமாள் அருள்பாலிக்கின்றார்.தன்னை நாடி வரும் பக்தர்களுக்கு என்றும் சத்தியமாய் துணை நிற்பார் என இறைவன் வாக்குறுதி தந்ததால் இறைவனுக்கு சத்தியமூர்த்தி எனப் பெயர் வந்தது.3

இக்கோயிலின் மூலவர் யோகசயனமூர்த்தியான திருமெய்யர் உருவம் ஸ்ரீரங்கம் ரங்கநாதரைவிட மிகப்பெரியது.இங்கு பள்ளி கொண்டுள்ள பெருமாள் உயரம் இந்தியாவிலேயே கோயில்களில் உள்ளவற்றில் பெரியது.சுற்றிலும் தேவர்கள்,ரிஷிகள்,பெருமாளின் நாபிக்கமலத்திலிருந்து பிரம்மா, மார்பில் குடியிருக்கும் லட்சுமி ஆகியோருடன் எழுந்தருளியுள்ளார்.மூலவரான பெருமாளுக்கு 12 ஆண்டுகளுக்கு ஒருமுறை தைல காப்பு இடப்படுகிறது.மது, கைடபர் எனும் இரு அசுரர்களிடமிருந்து பூமிதேவியையும், தேவர்கள், கின்னரர்களையும் காப்பாற்றி அருள்வதாக தல வரலாறு

பெருமாள், யோக நித்திரையில் இருக்கையில், அவ்வரக்கர்கள் ஸ்ரீதேவி,பூதேவி ஆகியோரை அபகரிக்க முயன்றனர்.இதனால் அவர்கள் ஓடி பெருமாளின் திருவடிகளில் சரணடைந்தனர்.பெருமாளின் நித்திரை கலைந்துவிடுமே என, அவரை எழுப்பாமல் ஆதிஷேசன் எனும் ஐந்து தலை நாகம் விஷத்தைக் கக்க அசுரர்கள் ஓடி ஒளிந்தனர்.பின் கண் விழித்த பெருமாள் ஆதிஷேசனை மெச்சிப் புகழ்ந்தார்

திருமெய்யம் குன்றின் தெற்கு நோக்கிய சரிவில் திருமாலுக்கும், சிவனுக்கும் அடுத்தடுத்து திருக்கோயில்கள் உள்ளன.இக்கோயில்கள் சைவ, வைணவ ஒற்றுமைக்கு உதாரணம் எனலாம்

இக்கோயில் சத்யபுஷ்கரணி அனைத்து பாவங்களையும் போக்கும் சக்தி வாய்ந்தது.

தாயார் உஜ்ஜீவனத் தாயார் (ஸ்ரீ உய்ய வந்த நாச்சியார்)
இவர் வீதி உலா வருவதில்லை.கோயிலுக்குச் சென்றால் மட்டுமே தரிசிக்க முடியும்.

42 - திருக்கோஷ்டியூர்

                                       

சௌமிநாராயணன் பெருமாள் கோயில்

சிவகங்கை மாவட்டத்தில் திருக்கோஷ்டியூர் அமைந்துள்ளது.மதுரையிலிருந்து 65 கிலோமீட்டர் தொலைவிலும், சிவகங்கை-திருப்பத்தூர் சாலயில்திருப்பத்தூருக்கு தெற்கில் 8 கிலோமீட்டர் தொலைவிலும், சிவகங்கைக்கு வடக்கே 24 கிலோமீட்டர் தொலைவிலும் இத்தலம் அமைந்துள்ளது.

கருவறையில், ஸ்ரீதேவி,பூதேவி  உடனுறை    சௌமிநாராயணனுடன்,மதுகைடபர்,இந்திரன், புருரூப சக்கரவர்த்தி,கதம்ப மகரிஷி,பிரம்மா, சரஸ்வதி, சாவித்ரி ஆகியோரும் உள்ளனர்.அருகில், சந்தான கிருஷ்ணன் தொட்டிலில் உள்ளார்.இவருக்கு பிரார்த்தனை கண்ணன் என்று பெயர்.மகாலட்சுமி தாயாருக்கு தனி சந்நிதி உள்ளது.

ஓம்ந மோ நாராயணாய..எனும் மூன்று சொற்களை உணர்த்தும் விதமாக இக்கோயிலின் அஷ்டாங்க விமானம் மூன்று தளங்களாக அமைந்துள்ளது.விமானத்தில் கீழ் தளத்தில் நர்த்த்ன கிருஷ்ணர்(பூலோக பெருமாள்) முதல்தளத்தில் ஆதிஷேசன் மீது சயன கோலத்தில் சௌமியநாராயணர் ,...இரண்டாவது அடுக்கில் நின்ற கோலத்தில் உபேந்திர நாராயணர்..மூன்றாம் அடுக்கில் அமர்ந்த கோலத்தில் பரமபதநாதர் எனசுவாமி நாங்கு நிலைகளில் அருளுகிறார்

புருரூப சக்கரவர்த்தி இத்தலத்தை திருப்பணி செய்த போது மகாமகம் பண்டிகை வந்தது.அப்போது பெருமாளை தரிசிக்க விரும்பினார் புருரூபன்.அவருக்காக ஈசான்ய (வடகிழக்கு) திசையில் உள்ள கிணற்றில்
கங்கை பொங்க அதன் மத்தியில் பெருமாள் காட்சி தந்தார்.பிரகாரத்தில் உள்ள இந்தக் கிணறு மகாமகக் கிணறு என அழைக்கப் படுகிறது.மகாமகம் போது சௌமிநாராயணர் கருடன் மீது எழுந்தருளி தீர்த்தவாரி செய்கிறார்

இரண்யகசிபை அழிக்கும் பொருட்டு...நரசிம்ம அவதாரம் எடுக்க தேவர்களுடன் ஆலோசிக்க இத்தலத்தில் பெருமாள் எழுந்தருளினார்.தேவர்களும் இத்தலத்தில் தவமிருந்த கதம்ப முனிவர்களும் விஷ்ணு, தான் எடுக்க உள்ள நரசிம்மர் கோலத்தையும், பின் சுவாமி நின்று, கிடந்த, இருந்த,நடந்த என நாங்கு கோலங்களை காட்டி அருளினார்.தேவர்களின் திருக்கை (துன்பததை) ஓட்டிய தலம் என்பதால் திருக்கோட்டியூர் ஆயிற்று

கோயில் பிரகாரத்தில் நரசிம்மர், இரண்யனை வதம் செய்த கோலத்தில் இருக்கிறார்.கோயில் முகப்பில் சுயம்புலிங்கம் உள்ளது.அஷ்டாங்க விமானத்தில் வலப்பக்கத்தில் நரசிம்மரின் அருகில் ராகு, கேது உள்ளனர்

பெரியாழ்வார்,திருமங்கையாழ்வார்,திருமழிசைஆழ்வார்,பூதத்தாழ்வார்,பேயாழ்வார் ஆகியோர் மங்களாசாசனம் செய்தத் தலம் இது.

41 - அழகர் கோயில்

                             

இத்தலம், மதுரையில் இருந்து 21 கிலோமீட்டர் தொலைவில் அமைந்துள்ளது.திருமாலிருஞ்சொலை என அழைக்கப்படும் இக்கோயில், பெரியாழ்வார்,ஆண்டாள்,பேயாழ்வார்,திருமங்கையாழ்வார்,பூதத்தாழ்வார்,நம்மாழ்வார் ஆகியோர்களால் மங்களாசாசனம் செய்யப்பட்டத்தலமாகும்.இவர்கள் மொத்தமாக சேர்த்து 108 பாடல்களை இத்தலம் குறித்து பாடியுள்ளனர்.

இத்தலம், சோலைமலை,திருமாலிருஞ்சோலை,மாலிருங்குன்றம் என்றெல்லாம் அழைக்கப்படுகிறது.பெருமாள் ஸ்ரீபரமசுவாமி எனப்படுகிறார்.உற்சவர் அழகர் அல்லது சுந்தராசப் பெருமாள் ஆவார்.

பாண்டிய மன்னர்கள், விஜயநகர மன்னர்கள்,மதுரை நாயக்க மன்னர்கள் ஆகியோர்களால் இக்கோயில் திருப்பணி செய்யப் பட்டுள்ளது.

மூலவரின் கருவறை விமானம் சோமசந்த விமானம் வட்ட வடிவமானது.
ஆரியன் மண்டபத்தில் கொடுங்கைகள் மற்ரும் இசைத்தூண்கள் உள்ளன.இசைத்தூணின் உச்சியில் உள்ள சிங்கத்தின் வாயில், சுழலும் நிலையில் ஆனால் வெளியே எடுக்கமுடியாதவாறு உள்ளது.
வசந்த மண்டபத்தில், ராமாயண, மகாபாரத  நிகழ்ச்சிகள் அழகிய ஓவியங்களாக உள்ளன.இராயகோபுரம், திருமலை மன்னரால் ஆரம்பிக்கப்பட்டு முற்றுப்பெறா நிலையில் உள்ளது.அழிந்த நிலையிலும் இக்கோபுரத்தின் சிற்ப வேலைப்பாடுகள் போற்றத் தக்கது.

கோயிலைச் சுற்றி உள்கோட்டை மற்ரும் வெளிக்கோட்டை  எனப்படும் இரணியங்கோட்டை அழகாபுரிக் கோட்டை அமைந்துள்ளது.

அழகர்கோயிலின் அடிவாரத்திலிருந்து 3 கிலோ  மீட்டர்  தொலைவில் ராக்காயி அம்மன் நூபுரகங்கை நீரூற்று உள்ளது

அழகர்கோயில் அடிவாரத்திலிருந்து 2 கிலோமீட்டர் தொலை வில் முருகனின் அறுபடைவீடுகளில் ஒன்றான பழமுதிர்சோலை உள்ளது

கள்ளழகர், மீனாட்சி அம்மனின் உடன் பிறந்தவர்.சித்திரை திருவிழாவின் போது கள்ளழகர், அழகர்கோயிலிருந்து புறப்பட்டு மீனாட்சி திருக்கல்யாணத்திற்கு மதுரை நகருக்கு வருகிறார்.வைகை ஆறுவரை வந்து வண்டியூர் சென்று அழகர்மலை திரும்புகிறார்.

                                               

                                                           கள்ளழகர்

திருமலை மன்னர் காலத்திற்கு முன் கள்ளழகர் வைகை ஆற்றிலிறங்கும் விழா சித்திரை மாதம் முழுநிலவன்று மதுரையை அடுத்த தேனூரில் நடைபெற்றது.திருமல நாயக்கர் காலத்தில் கள்ளழகரை வைகை ஆற்றில் எழுந்தருளச் செய்து மதுரை சித்திரைத் திருவிழாவாக நடத்தப்பட்டது.சித்திரைத் திருவிழாவின் போது கள்ளழகர் மதுரைக்கு வரும் நிகழ்வை எதிர்சேவை என்று கொண்டாடப்படுகிறது

சுதபமுனிவர் திருமாலிருஞ்சோலையில் உள்ள நூபுரகங்கை எனும் சிலம்பாற்றில் நீராடும் போது எதிர்ப்பட்டதுர்வாசமுனிவரைக் கவனிக்காமல் இருக்க, அதைக் கண்ட துர்வாச முனிவர் , சுதபரை மண்டூகமாக (தவளையாக) இருக்க சாபமிட்டார்.சாபம் நீங்க சுதப முனிவர் வைகையாற்றில் நீண்ட காலம் தவமிருக்க திருமாலால் சாபம் நீங்கப் பெற்றார்.முனிவர் அங்கு வணங்கியவரே சுந்தரபாஹூ என்று வடமொழியிலும், அழகர், மாலிருஞ்சோலை னம்பி என்று தமிழிலும் அழைக்கப்பட்டார்

கோயில் பிரகாரத்தில் உள்ள ஜ்வாலாயோக நரசிம்மர் உக்கிர ரூபத்தில் உள்ளதால் நரசிம்மரின் உக்கிரத்தைத் தவிர்க்க தினமும் தண்ணீர்,தயிர், வெண்ணெய்,தேன் முதலியவற்றால் திருமஞ்சனம் (அபிஷேகம்) செய்யப்படுகிறது).ஜ்வாலாயோக நரசிம்மரின் கோபத்தைத் தணித்து சாந்தி அடைவதற்காக சன்னதிக்கு மேல் காற்று வருவதற்காக அடிக்கூரை திறந்த நிலையில் உள்ளது.மகாவிஷ்ணு கோயிலில் நரசிம்மர் மூலவரின் இடது ஓரத்தில் இருப்பார்.இங்கு மூலவருக்கு நேர் பின்புறமுள்ளார்

மூல்வர் - அழகர் அல்லது அழகிய தோளூடையான் (வடமொழியில் சுந்தரபாஹூ)

தாயார்- சுந்தரவல்லி

கிழக்கே திருமுக ம்ணடலம்

தீர்த்தம் - நூபுர கங்கை எனும் சிலம்பாறு

உற்சவர்- கள்ளழகர்

அழக்ர்மலை அழகருக்கு வித்தியாசமாக தோசை நைவேத்தியம் செய்யப்படுகிறது.அரிசி, உளுந்து,மிளகு, சீரகம், நெய் கலந்து தோசை தயாரிக்கப்படுகிறது

40 - திருப்பார்த்தன் பள்ளி

                               

தாமரையாள் கேள்வன் கோயில்


இத்தலம் சீர்காழி அருகில் திருவெண்காட்டிலிருந்து அரைமைல் தூரத்தில்  அமைந்துள்ளது.திருநாங்கூர் பதினோரு திருப்பதிகளுள் இதுவும் ஒன்று. பார்த்தனுக்காக (அர்ச்சுனன்) உண்டான கோயில் ஆனதால் பார்த்தன் பள்ளியாயிற்று.அர்ச்சுனனுக்கும் இங்கு ஒரு கோயில் உண்டு.

வருணன், இங்கு திருமாலைக் குறித்து தவமிருந்து தனக்கு பார்த்தசாரதியாக காட்சியளிக்க வேண்ட, அப்படியே நடந்தபடியால் பார்த்தசாரதிபள்ளியென வழங்கி, பின்னர் பார்த்தன்பள்ளி ஆயிற்று.பதினோரு திருப்பதிகளின் இறைவர்களும் தை அமாவசைக்கு இங்கு எழுந்தருளி   மறுநாள்  திருநாங்கூர் கருட சேவைக்கு எடுத்துச் செல்லப்படுவர்.

தனியாக யாத்திரை மேற்கொண்ட அர்ச்சுனன் தென்னாட்டில் பூம்புகார் சங்கம முகத்திற்கு நீராட வந்த போது புரசங்காடு எனும் வனப்பகுதியை அடைந்தான்.அப்போது, தாகம் எழ நீர் தேடிச் சென்றபோது...அகத்தியர் ஆசிரமம் வந்த அர்ச்சுனன் அவரிடம் தண்ணீர் கேட்க...அகத்தியரும் தன் கமண்டலத்திலிருந்த் நீரைப் பருகக் கொடுத்தார்.ஆனால், அர்ச்சுனனால் அருந்த இயலாதவாறு நீர் மறையவே  வருந்தினான்.அகத்தியர் தனது ஞானதிருஷ்டியால் காரணத்தைக் கண்டறிந்தார்.

பல்வேறு சோதனைகளிலும் காத்த கண்ணனை நினையாது, என்னிடம் நீர் கேட்டது பொறுக்காததால் கண்ணன் செய்த லீலை இது எனக்கூற...அர்ச்சுனன் கண்ணனை நினைத்து வேண்ட கண்ணன் தரிசனம் கொடுத்து, கத்தியால் பூமியைக் கிளறச்சொல்லி, அதிலிருந்து நீர் வந்தது.அர்ச்சுனன் தாகம் தணிந்தான்

இறைவன் - மேற்கு நோக்கி நின்ற கோலத்தில் தாமரையாள் கேள்வன்
உற்சவர்- பார்த்தசாரதி
தாயார் - தாமரை நாயகி, ஸ்ரீசெங்கமவல்லி
தீர்த்தம்- சங்க சரஸ்

(திருநாங்கூர் பதினோரு திருப்பதிகள் எனக் கூறப்படும் தலங்கள்

திருக்காவளம்பாடி
திருவண்புருடோத்தமம்
திரு அரிமேய விண்ணகரம்
திருச்செம்பொன் செங்கோயில்
திருமணிமாடக் கோயில்
திரு வைகுந்த விண்ணகரம்
திருத்தேவனார்த் தொகை
திருத்தெற்றியம்பலம்
திருமணிக்கூடம்
திருவெள்ளக்குளம்
திருப்பார்த்தன் பள்ளி)

39 - திருவெள்ளக்குளம்

                                 

அண்ணன் பெருமாள் கோயில்

சீர்காழியிலிருந்து 8 மிலோமீட்டர் தொலைவில் சீர்காழி- டஹ்ரங்கம்பாடி சாலையில் அமைந்துள்ளது.திருநாங்கூர் பதினோரு திருப்பதிகளுள் இத்தலமும் ஒன்று.

இத்தலத்தின் முன்புறம் அமைந்துள்ள ஸ்வேத புஷ்கரணி தீர்த்தத்தால் இத்தலத்திற்கு இப்பெயர் வந்தது.வடமொழியில் ஸ்வேதம் என்றால் வெண்மை.எனவே ஸ்வேத புஷ்கரணி...வெள்ளைக் குளமாகி பின் வெள்ளக்குளமாயிற்று.திருமங்கையாழ்வாரால் பாடப் பெற்ற தலம்.அவர் இத்தல இறைவனை அண்ணா என அழைத்துப் பாடியமையால் அண்ணன் கோயில் என்றும்   அழைக்கப்படுகிறது

அழகியமணவாள முனிக்கு இறைவன் இங்கு காட்சியளித்ததாக நம்பிக்கை.108 வைணவத் திருத்தலங்களில் திருமலையில் இறைவனுக்கும் வழங்கப்பட்டுள்ள பெயரே இத்தலத்திலும் இறைவனின்  பெயராக   உள்ளது.
இப்படி பெயர் உள்ளத் தலம் இது ஒன்றே.ஆகவே,  திருவேங்கடத்தானுக்கு    வெள்ளக்குளத்தான் அண்ணன் என்ற நம்பிக்கையில் திருப்பதிக்கு வேண்டுதலையை இங்கு செலுத்துவது மரபு. இதற்கு அதனால்  தென் திருப்பதி ர்ன்றும் பெயர்

திருமங்கையாழ்வார் மணந்த குமுதவல்லியின் பிறந்த தலமும், நீலன் என்ற பெயரில் பதியாக இருந்த திருமங்கையாழ்வார், ஆழ்வாராக மாறிய தலமும் இதுவாகும்.ஒரு மங்கையால் ஆழ்வாராக ஆனதால் திருமங்கையாழ்வார் என அழைக்கப்பட்டார்

இறைவன் கிழக்கு நோக்கி நின்ற கோலத்தில் அருள்பாலிக்கிறார்

இறைவன் - ஸ்ரீனிவாசன், பெருமாள்
தாயார் - அலர்மேல்மங்கை
தீர்த்தம்-ஸ்வேதபுஷ்கரணி

37 - திருமணிக்கூடம்

                                       

வரதராஜப் பெருமாள் கோயில்

திருமணிக்கூடம் திருநாங்கூருக்கு கிழக்கே அரை மைல் தொலைவிலேயே உள்ளது.திருநாங்கூர் பதினோரு திருப்பதிகளில் இதுவும் ஒன்று

திருமணிக்கூடம்....பெயருக்கு ஏற்ப இத்தலம் மணிக்கூடம் போன்ற அமைப்பில் கட்டப்பட்டுள்ளது.பதினோரு திருப்பதி பெருமாள்களும் எழுந்தருளும் தைஅமாவாசைக்கு மறுநாள் கருடசேவைத் திருவிழாவிற்கு இத்தலப் பெருமாளையும் எடுத்துச் செல்வர்

கீழ்த்திசை நோக்கி நின்ற திருக்கோலத்தில் இறைவன் இங்கு அருள்பாலிக்கிரான்.தாமரை பீடத்தி மீது நின்ற கோலத்தில், பின் கைகளில் சங்கு, சக்கரமும் முன் கைகளில் அபய, ஊரு முத்திரைக் காட்டியபடி அருள்பாலிக்கிறார்.வலது புறத்தில் தாமரை பீடத்தின் மீது நின்றபடியே இடது கரத்தில் தாமரை மலரும், வலது கரத்தைத் தொங்கவிட்டபடியும் ஸ்ரீதேவி காட்சியளிக்கிறார்.இடது புறத்தில் பூமாதேவி வலது கரத்தில் தாமரை மொட்டும் ,இடது கரத்தைத் தொங்க விட்டபடியும் இருக்கிறார்.

அர்த்த மண்டபத்தில் நம்மாழ்வார் அமர்ந்த நிலையில் உள்ளார்.

இறைவன் - வரதராஜப் பெருமாள், கஜேந்திர வர்மன்,மணிக்கூட நாயகன்

தாயார்- திருமாமகள் நாச்சியார், (ஸ்ரீதேவி) மற்றும் பூதேவி

தீர்த்தம் - சந்திர புஷ்கரணி